1º ESO: Despedida do curso

Bos días a todos!!!👋😀

 ‌

Como sabedes, esta semana tampouco teredes ningunha tarefa nova e eu xa estou recopilando todas as vosas calificacións para darvos unha nota final (tereina ao longo desta semana).

 ‌

Sei que esta non foi a millor forma de aprender cousiñas sobre Mesopotamia, Exipto, Grecia ou Roma e que de seguro, na clase, divertiriamonos moitííísimo máis! 

 

Aínda así, quero agradecervos a todos (papis e mamis e todos esos apoios que tedes detrás, incluidos) o esforzo que estivestedes a facer para seguir a materia e achegarnos, aínda que só fóra un pouquiño, a esta parte taaan interesante da nosa Historia.

 ‌

 Quero felicitarvos tamén, porque a maioría de vós fixéstedes un traballo impresionante!!

 ‌

Extrañei moito poder vervos cada semana, sobre todo, porque tampouco tiven moito tempo ao principio (chegaba a bebé!!! 👶), por iso, agardo vervos canto antes e poder felicitarvos en persoa. De seguro que en setembro o poderei facer! 😍

 ‌

‌

Só me queda desexarvos que pasedes un verán INCRIBLE!! Non vos olvidedes de que a Historia estase a construir todos os días e vós xa sodes parte dela: dentro duns anos esta situación estudiarase nos colexios e vós poderedes dicir "eu estiven alí" pero a historia máis importante que poderedes contar vós é a vosa, por iso, para este verán non vos olvidedes do que aprendimos grazas a esta pandemia:

 

• 💓 Desfrutar da familia, de rir cos papis e cos irmáns, do valor dos abrazos e os agarimos, de que para ser feliz non precisamos cousas se non a eles...
   ‌
• 😂 De rir todos os días, porque todas as situacións teñen solución, porque sempre sae o sol e porque de todo, bo e malo, se aprende.
   ‌
• 🌞 Adicade o verán a saltar nos charcos cando chova, a cheirar profundo as florciñas e o verde dos vosos pobos, a mirar os sorrisos da xente cando por fin poidamos velos sen mascarilla, a desfrutar do solciño na nosa pel, a visitar aos avós e darlle moitos agarimos, a desfrutar das comidas todos xuntos, a xogar, a ler, a pintar de cores os vosos días...
   ‌
  Esos son os meus deberes. Os de construir recordos preciosos para a vosa historia, para contarlle aos vosos netos, algún día, o magnífico verán que pasastedes despois daquela pandemia do coronavirus. De seguro que iso, non o olvidades xamais. 😊
  ‌
   Síntome moi orgullosa de poder ter sido a vosa profesora.😍
   ‌
  Bea.
  Unha aperta enorme, a máis grande que vos mandei nunca!
  ‌
   
• 
  
• 
  

1º ESO Ímonos á Hélade! Resolución tarefa

Bos días a todos!!!👋🌞

Hoxe deixovos aquí a resolución á mini-tarefa sobre a pintura grega. 

                     Fixéstelo xenial! 👏😊


      Resolución Ímonos á Hélade! Pintura grega

1º ESO Rematamos!!

Bos días a todos!🌞

Nesta semana, como vos comuniquei a semana pasada, non teredes ningún traballo adicional e adicarémola a repasar o que xa vimos, resolver as tarefas pendentes e aclarar as dúbidas que poidades ter.

Podedes contactar conmigo polas vías de sempre, mediante a nosa aula de Edmodo ou empregando o correo electrónico.

Unha aperta enorme para todos e hoxe máis que nunca...

Bo traballo pequenos historiadores!!!

Bea 😊

1º ESO Unha de romanos: Tarefa 2. O Imperio e a crise final

Bos días a todos!🌞

Imos hoxe coa segunda tarefa da evolución de Roma. Hoxe imos a traballar sobre a etapa do Imperio romano e a crise final do mesmo. Tamén repasaremos de novo algunhas cuestións clave da sociedade, construción, relixión...

Para iso só tedes que contestar ao pequeno exercicio que tedes en Edmodo e que comprende preguntas de verdadeiro/falso, escoller a opción, etc.

Esta será a última actividade que vos suba. A semana que vén dedicarémola a repasar e podedes aproveitar para enviar algunha tarefa que teñades atrasada!

Agardo que vos resulte doado!!

Unha aperta enorme,

Bea.😍

1º ESO Unha de romanos: Tarefa 1

Bos días a todos!🌞

Hoxe faremos unha pequena tarefa de repaso sobre a fundación de Roma e as etapas da Monarquía e a República. Tédela colgada en Edmodo e consiste en varias preguntas de Verdadeiro/Falso, escoller a opción correcta e encher os ocos.

Calquera dúbida aquí estou para resolvela!

Unha aperta,

Bea.

1º ESO Unha de romanos

Bos días a todos!🌞

Hoxe comezamos un novo tema onde nos imos achegar ata o Imperio Romano. Para comezar imos ver esta liña do tempo onde se ve claramente as diferentes etapas polas que pasou a civilización romana:

Como vemos, Roma foi fundada no ano 753 a.C. cando vivían na zona de Italia numerosos pobos, como os etruscos ou os latinos. Istes últimos levantaron varios poboados na zona coñecida como os Sete Outeiros e da súa unión naceu a cidade de Roma.

A historia de Roma ten tres etapas como vemos na liña do tempo: a Monarquía, a República e o Imperio. Logo entrará en crise, acuciada por revoltas sociais e invasións barbaras e rematará dividida en dúas zonas: o Imperio Romano de Occidente (que acabará desintegrándose no ano 476) e o Imperio Romano de Oriente ou Imperio Bizantino.

Antes de comezar imos a ver este pequeno vídeo de Academia Play que fai un repaso de 10 minutos pola historia de Roma:

E agora imos co tema. 

Nesta ocasión imos a organizarnos dunha forma diferente. Primeiro imos a ver as explicacións ao tema en vídeo e cun pequeno resumo que vos adxunto e nos vindeiros días traballaremos sobre o tema. Por iso, hoxe non tendes ningunha tarefa e o único que debedes facer é mirar estos videos e os esquemas que seguen e preguntarme se tedes algunha dúbida.
Os próximos días poderedes volver a esta entrada se necesitades calquera axudiña para realizar as tarefas que vos propoño.

Para comezar, vouvos deixar a explicación en vídeo do profe de A cuna de Halicarnaso que xusto fai un repaso moi bo polas etapas da historia romana.

Neste primeiro video repasamos a fundación de Roma e a forma de vida da sociedade romana. No segundo podedes ver a evolución política de Roma a través das tres fases que falamos antes e, por último, no terceiro o profe contanos varias curiosidades desta civilización, fálanos de diferentes guerras civís ou do legado romano, por exemplo.

Imos agora a situarnos ben cuns pequenos trazos da cultura romana:

Onde?

Os pobos de Italia. VicensVives.

A cidade de Roma. VicensVives.

Cando, como e por que?

Ben, ata aquí con esta aproximación. Mañá traballaremos sobre o nacemento de Roma e a fase da Monarquía e o mercores sobre a República e o Imperio. Por último, a semana que vén afondaremos na sociedade e economía e no legado romano.

Unha aperta,

Bea.

1º ESO Ímonos á Helade! Tarefa repaso final: Kahoot! Quen sabe máis?

Bos días a todos!!!👋🌞

Hoxe imos a facer un repasiño do tema que estivemos vendo estas semanas, a Antiga Grecia.

Para iso, primeiro imos a ver uns vídeos que nos explican polo miúdo este tema (por se quedou algún fleco solto! 😉) Cada vídeo está adicado a unha etapa da historia grega (arcaica, clásica e helenística), así que podedes velos todos ou o que trate sobre a etapa que máis vos interesa:

Agora imos coa tarefa final de repaso diste tema que, nesta ocasión, é un concurso en Kahoot!

Para facela debedes por o voso nome despois de facer click na seguinte ligazón e ser os máis rápidos en acertar as preguntas para gañar! A puntuación que saquedes será a que vos engada ao voso progreso en Edmodo, calculada sobre 10:

Reto Kahoot! Ímonos á Hélade! Quen sabe máis?

Ata aquí por hoxe.

Unha aperta grande,

Bea.😍

1º ESO Resolución tarefas "Ímonos á Hélade! Da época clásica ao imperio de Alexandre Magno"

Bos días a todos!!🌞

Aquí vos queda a resolución á tarefa que vos propuña para traballar sobre o imperio de Alexandre Magno: 

Resolución Ímonos á Helade! Da época clásica ao imperio de Alexandre Magno

A todos os que xa ma entregastedes xa vos fixen correccións individuais pero deixoa aquí para que todos podamos ver cal era a resposta correcta.

Unha aperta Mini Historiadores!!

Moi ben todos!!!👌😉

Bea🌈

1º ESO Ímonos á Hélade! A pintura en Grecia (e Roma!)

Bos días a todos!!!👋🌞

Hoxe só teremos unha pequeniña tarefa, porque tendes que facer o cuestionario sobre a escultura que vos subín na vosa aula de Edmodo e, si tendes, preguntas escribirme para resolvelas!

Mañá faremos a tarefa final deste tema, cun repasiño por todas as cousiñas que estudiamos.

Adicaremos esta entrada a repasar as características da pintura grega e romana pois, como estamos vendo, en mitoloxía e arte parécense moito... logo prantexareivos un reto! 😊

                               Comezamos!

Gregos e romanos adoitaban decorar as paredes das súas casas con pinturas MURAIS. Tamén podían pintar sobre tabliñas ou en sarcófagos, entre outros, para decoralos.

Placa superior da Tumba do Zambullidor, en Paestum, Magna Grecia.
Fonte imaxe: Grecia Antigua. El Alba de Occidente. Furio Durando. Ediciones Folio, 1.997

Crátera grega: empregábase para mesturar viño, auga e especias.

Dos gregos case non nos chegaron mostras deste tipo pero sí temos moitas pinturas en cerámicas (en vasixas, pratos...), como a crátera que vos ensino nesta imaxe.

Pola contra, como veremos no seguinte tema, a erupción do Vesubio no 79 d.C. deixou sepultadas as cidades romanas de Pompeia e Herculano, que permaneceron intactas debaixo da cinzas conservando moitas pinturas nas súas paredes.

Ademáis de pinturas murais e cerámicas, os gregos e romanos tamén van a empregar moito os MOSAICOS, que consistían en pequenos anacos (teselas) de azulexo ou pedra coloreada que se colocaban en solos ou paredes formando debuxos ou filigranas. Aquí debaixo tedes un ben chulo!

Mosaico da Casa dos Delfíns, en Delos, illa das Cícladas.
Fonte imaxe: Grecia, entre el mito y la Historia. 8.500 años de civilización, pág. 270. Ediciones Xaitalis, Atenas, 2.001.

O reto que vos prantexo sobre a pintura grega é o seguinte:

Serás quen de averiguar que?

Unha aperta enorme,

Bea.

1º ESO Ímonos á Hélade! Arte Clásica 2

Bos días a todos!🌞

Hoxe continuaremos coa segunda parte da arte clásica é, para iso, imos a sumerxernos na escultura grega.
Para comezar imos a ver uns pequenos vídeos onde nos contan as características esenciais desta escultura e nos amosan moitos exemplos (moi famosos!!). 

Imos alá:

E neste último tendes un repaso de toda a lección! Ademáis, se só queres ver a parte de escultura podedes ir ao minuto 32:55 no que a profesora Rosa Liarte nos explica as características esenciais da arte clásica (grega e romana):

Agora imos coa nosa explicación:

Antes de comezar temos que explicar que é unha escultura e en que se diferenza dun relevo.

O relevo é unha representación esculpida na pedra pero que permanece unida á mesma. A escultura é independente do bloque de pedra, está exenta. Vémolo con estos exemplos:

Este é un relevo do Partenón (s V. a.C.) feito por Fidias.

Esta é unha escultura grega, neste caso de bronce, coñecida como "Dios del cabo Artemisio" ou "El Poseidón" e é do século V a.C.

Como xa vimos cando repasamos a arquitectura grega, os artistas gregos adornadaban os seus edificios con relevos e esculturas pintadas con cores vivas.

Que querían representar os gregos coa súa escultura?

Pois ben, os gregos buscaban a BELEZA IDEAL do corpo humano e, para iso, desenvolveron un modelo ou CANON que establecía as proporcións entre as distintas partes do corpo (verémolo logo).

Tamén intentaron ser realistas cando esculpían retratos, algo novedoso.

Máis adiante, os romanos, seguirán os modelos gregos e copiarán moitas esculturas que chegarán ata os nosos días.

Na escultura grega disntiguimos tres etapas: a ARCAICA, a CLÁSICA e a HELENÍSTICA, que se corresponden coas devanditas etapas históricas que xa estudamos. Podemos velo neste esquemiña:

Fonte imaxe: https://www.slideshare.net/ignaciosobron/la-escultura-griega-115603202

As esculturas da época arcaica son ríxidas, estáticas e esquemáticas. Aparecen como de fronte e a expresión do rostro é hierática, cun medio sorriso. Soen representar mozos espidos (koúroi) e mozas con vestidos (korai). Imos a ver uns exemplos:

Este é o Kurós de Anavyssos

Esta é a Koré do Peplo

Na época clásica (séculos V e IV a.C.) amosábase o corpo humano de xeito proporcionado e harmónico e os rostros amosaban unha expresión serena. As proporcións considerábanse perfectas se a altura do ser humano era exactamente, sete veces a altura da súa cabeza (segundo Polícleto ou 7 e media segundo Lisipo), esto é o que se coñece como CANON CLÁSICO. Podemos velo na seguinte imaxe:

Na época helenística imos a ver que cambia a expresividade dos rostros. Búscase máis dramatismo e realismo, amosando as emocións humanas (dor, forza, tensión...). Melloran a representacións das vestimentas e dos detalles do rostro.

Entre os principais escultores gregos destacan Fidias, Mirón ou Polícleto (durante o século V a.C.) e Lisipo e Praxíteles no IV a.C. entre outros.

Vemos algunhas das súas obras?

Esta primeira é das mais famosas. Coñécese como "O discóbolo" e é obra de Mirón.

Na imaxe superior, as que nos amosan os canon, vimos dúas obras: unha de Polícleto e outra de Lisipo. Imos ver algunha máis:

Este é o Diadumeno, de Polícleto.
Debaixo temos un retratro de Alexandre Magno visto por Lisipo.

Esta é a Atenea Varvakeion, de Fidias.

E aquí temos a Hermes e Dionisos, de Praxíteles:

Por último imos a ver unha escultura helenística moi famosa, O Laoconte e os seus fillos, obra anónima:

Neste enderezo podedes facer un puzzle desta obra se queredes entretervos un ratiño:

Puzzle do Laoconte

Cal vos gustou máis?

Coñecedes algunha outra que queirades compartir coa clase?

Para repasar este punto imos a realizar un sinxeliño cuestionario que tendes na vosa aula de Edmodo.

Calquer dúbida podedes consultarma mediante Edmodo ou ao meu correo electrónico (b.nieto.ou@gmail.com)

Unha aperta grande para todos!

Bea😊

1º ESO Ímonos á Hélade: Arte clásica 1

Bos días a todos!🌞

Hoxe imos a sumerxirnos na preciosa arte grega e romana (que como pasou coa mitoloxía van a "copiar").

Para ter unha idea clara (e moi divertida) de como era a arte dos gregos e romanos imos a ver estos dous pequenos vídeos e logo a explicación que vos deixo a continuación:

Como vemos, os gregos non levantaban construcións colosais (como os exipcios ou os mesopotámicos) se non que buscaban A BELEZA e, por iso, facían todo ao tamaño do home, buscando harmonía e proporción.

Como vimos onte, un dos edificios gregos máis importante era o TEMPLO (que se dedicaban a un deus) pero tamén levantaron moitos outros edificios, como os TEATROS.

Na primeira imaxe vemos o teatro de Epidauro, edificado no século IV e que chegou aos nosos días tal e como vedes na fotografía.

Os teatros tiñan forma semicircular (os circulares chámanse ANFITEATROS, como o famoso Coliseo romano) e todos se organizaban en tres partes: a cávea (no alto, unha zona de bancos para os espectadores), a orquestra (onde se situaba o coro) e a escena (onde se representaban as obras).

Pola súa parte, os templos tamén tiñan todos a misma forma, seguindo as seguintes normas:

• Construíanse con mármore ou pedra.
• A súa forma, a PLANTA, era rectangular, aínda que había algún circular.
• Non se erguían directamente dende o chan, senón que primeiro lle puñan un basamento con escalóns e rodeabano de columnas (esto chámase peristílo) 
• O interior tiña tres partes: Pronaos, Naos ou Cella e Opistódomo. Podemos velo na imaxe que vos adxunto dunha planta dun templo grego.
• No interior da Cella, situábase a estatuta do deus ao que se lle adicaba o templo.
• O exterior decorábase on relevos, situados no FRONTÓN e no FRISO (podedes ver onde se sitúan na imaxe do Partenon).
• Ises relevos adoitaban pintarse de vermello, azul, amarelo...

Este templo é o Partenon, situado na Acrópolis de Atenas e adicado a deusa protectora da cidade: Atenea.
Como vedes, temos diante o altar onde realizar ofrendas ou sacrificios.
Logo uns chanzos para subir ata o pronaos. Ese conxunto de chanzos forma o basamento do que vos falaba antes.
Decorando o templo, temos os relevos do frontón (que é o trianguliño que forma o tellado coa fachada) e o friso (que é esa tira decorada que vai debaixo do frontón e percorre todo o perímetro do templo).
As columnas remataban no dintel ou arquitrabe.
Se poidésemos entrar no templo, logo do pronaos, encontrariamos o naos ou cella, coa estatua de Atenea, nese caso. Máis adiante estaría o opistódomo, onde os sacerdotes gardaban as ofrendas a deusa.
Como vedes, o templo está rodeado de columnas (o perístilo) e o tellado está decorado en cadansúa esquiniña cunha acrótera ou pequena escultura.

Aquí vos queda un vídeo onde podedes ver como era o Partenón.

Para conseguir que as construcións gregas foran proporcionadas, os gregos estableceron tres estilos ou ordes arquitectónicas: a dórica, a xónica e a corintia.

E que é unha orde? Pois sinxelamente a disposición dos elementos da fachada (columnas, capiteis, arquitrabe...) Imos a velo:

Como vemos na imaxe, os gregos desenvolveron tres ordes.

A orde dórica era sobria, coa columna lixeiramente ancheada e con estrías (liñas marcadas) e non tiñan basa. No friso alternábanse triglifos (esas tres liñas verticais) con metopas (a zona lisa, que adoitaba encherse con relevos ou pinturas).

A orde Xónica era máis esbelta. As columnas sí tiñan basa e o capitel estaba decorado con volutas (esa especie de espiral que leva a cado lado). O friso decorábase con relevos.

Por último, a orde corintia era moi parecida a xónica pero coa diferencia de que o capitel estaba decorado con follas de acanto e a columna non adoitaba a estar estriada.

Templo do Tesouro dos Atenienses (Delfos), de estilo dórico, 490 a.C.

Templo de Atenea Niké, xónico.

Templo de Zeus ou Olimpeion, de estilo corintio, séculos VI a.C. - II d.C.

Ata aquí por hoxe, deixovos coa tarefiña de repaso deste tema:

1. Imos a facer este xogo, tendes que engadir o voso nome para que poida ver que o fixestedes e logo mandádesme a vosa puntuación a través de Edmodo ou ao meu email (b.nieto.ou@gmail.com).

Xogo: As partes dun templo grego

2. Ides a debuxar na libreta un templo grego e sinalar as súas partes.

Ademáis deberedes debuxar tamén os tres tipos de ordes e sinalas as súas partes. Podedes utilizar as seguintes plantilla para facelo:

Nada máis por hoxe,

Calquera dúbida xa sabedes que podedes remitirma mediante o correo electrónico ou o sistema de mensaxería de Edmodo.

Moito ánimo e mil apertas,

Bea 🌈

1º ESO Imos á Hélade!: Zeus, rei do Olimpo.

Bos días a todos!🌞

Hoxe imos a mergullarnos na mitoloxía grega e coñecer aos principais deuses gregos e as crenzas dos habitantes da Hélade.

Como sabemos, os gregos crían que existían moitos deuses, eran POLITEÍSTAS. Para explicar a orixe da Terra, a existencia dos homes e moitas cousas máis, elaboraron moitos mitos, narracións fabulosas onde se contaban as fazañas dos DEUSES e dos HEROES. 

Como veremos no seguinte tema, os romanos van a coller a relixión grega e adaptala ás súas crenzas.

Os deuses gregos (e os romanos tamén) tiñan forma humana, eran inmortais e tiñan poderes.
Vivían no Monte Olimpo e desde alí dirixían o mundo.
Cada deus é o patrón dalgunha cousa concreta (a muller, a guerra, a sabiduría...) e ten un atributo que o identifica (por exemplo un raio, un casco, unha lanza...). 

O deus máis importante e poderoso do Olimpo era ZEUS. A súa esposa é Hera (a deusa do fogar) e Poseidón (deus dos mares e océanos) e Hades (deus do inframundo) son os seus irmáns. Ten moitíííísimos fillos, algúns deles metade humanos, como os deuses Apolo, Afrodita ou Dionisio.

Cando un deus ou deusa tiña un fillo cun ser humano, nacía un semideus. Estos semideuses eran mortais.
Os heroes (moitas veces fillos dun deus e unha mortal) diferenciábanse dos humanos e dos deuses e caracterizábanse por poder realizar fazañas incríbles. Seguro que coñeces algún como o famoso Heracles/ Hércules ou Aquiles.

Pero ademáis, na mitoloxía clásica, temos moitos máis personaxes fantásticos que posuían calidades especiais, como os centauros (metade home, metade cabalo), os cíclopes (xigantes que só tiñan un ollo), etc.

E como se creou a Terra segundo a mitoloxía grega?

Os gregos contaban que Urano (o ceo) e Xea (a Terra) tiveron un fillo, Cronos (o tempo). Cronos, a súa vez, tivo varios fillos, un deles Zeus. Zeus enfrontouse a seu pai e gañou, converténdose no rei dos deuses.

Hai moitas pelis chulas sobre a guerra entre os titáns e os deuses, onde podedes ver este enfrontamento, por exemplo "Ira de Titanes" ou "Furia de Titanes".

Quen era quen?

Como vemos na seguinte lista, cada deus grego (en violeta) vai a ter o seu correspondente deus romano (en verde). Aquí vos deixo sobre que gobernaba cada un deles:

• Zeus / Xúpiter (pai dos deuses)
• Hera / Xuno (o matrimonio e a familia)
• Apolo / Apolo (a arte)
• Afrodita / Venus (o amor e a beleza)
• Artemisa / Diana (a caza)
• Hermes / Mercurio (o mensaxeiro)
• Atenea / Minerva (a sabedoría)
• Deméter / Ceres (a agricultura)
• Hestia / Vesta (o lume do fogar)
• Poseidón / Neptuno (o mar)
• Dionisio / Baco (o viño)
• Hades / Plutón (o inferno)
• Ares / Marte (a guerra)

E onde adoraban os gregos aos deuses?

Os gregos, e logo os romanos, tiñan que ter contentos aos deuses para que todo lles fóse ben! Para iso levantaban TEMPLOS nas cidades. O caso é que os cidadáns normais non podían acceder ao interior do templo, onde se gardaba a estatua do deus ao que estaba adicado o tempo.

Cada ano celebrábanse festas na honra de cada deus, procesións, ofrendas, sacrificios (de animais: galiñas, ovellas...) e libacións (derramar un líquido como leite, mel, sangue...). Estas cousiñas facíanse nun altar que se poñía fronte o templo.

Os gregos (e os romanos) tamén tiñan que rezar nas súas casas aos deuses da familia e o fogar (chamados LARES e PENATES). Por iso, en cada fogar o pai de familia organizaba ese culto arredor dun pequeno altar (que se chamaba larario). Aquí vemos unha imaxe dun larario romano atopado na cidade de Pompeya nunha casiña coñecida como Casa Vetti:

E para coñecer o futuro?

Os gregos e romanos eran moi supersticiosos, por iso, antes de facer calquera cousa querían saber que opinaban os deuses e como lles ía saír o asunto.

Para isto, acudían aos ORÁCULOS, que eran recintos sagrados onde un sacerdote ou oráculo interpretaba a vontade dos deuses. A maioría das veces os mensaxes eran moi enigmáticos e tiñan que ser interpretados polas PITIAS ou SIBILAS.

Por exemplo, ás veces había que interpretar o voo ou canto dos paxaros (esto chamábase AUSPICIOS).

A pitia de Delfos interroga os deuses no templo de Apolo ante un sacerdote.

Como curiosidade, sabiades que os famosos Xogos Olímpicos naceron aquí, en Grecia, como unha forma de tributo aos deuses?

Pois sí. Os primeiros xogos tiveron lugar no 776 a.C. na cidade de Olimpia, onde se atopaba o santuario máis importante adicado ao deus Zeus.

Ata aquí por hoxe!!

Para repasar a mitoloxía tendes un cuestionario agardándovos na nosa aula de Edmodo.

Calquera dúbida podedes prantexarma ao meu email (b.nieto.ou@gmail.com) ou mediante o sistema de mensaxería de Edmodo.

Unha aperta moi grande!

Bea 🌈